பேசும் தாரகை

அண்மைய நாட்களில் உலகளவில் மிகவும் பரபரப்பான நாடுகளில் ஒன்றாக பாகிஸ்தான் மாறியிருக்கிறது. அதற்குக் காரணம் மோசமான தாக்குதல்கள் பயங்கரவாதிகளால் நடத்தப்படும் நாடுகள் வரிசையில் அது முதலிடத்தில் இருப்பதேயாகும். பாகிஸ்தானில் நடத்தப்பட்ட தாக்குதல்களுக்கு தலிபான்கள் உரிமை கோரியிருக்கிறார்கள்.
பயங்கரவாதிகளின் பட்டியலிலிருந்து தலிபான்களின் பெயரை நீக்க வேண்டுமென ஆப்கானிஸ்தான் ஜனாதிபதி ஹமீட் கார்சாய் ஐக்கிய நாடுகள் சபையிடம் கோரிக்கை விடுத்த நிலையில் அவர்களால் பாகிஸ்தானின் லாகூர் நகரிலுள்ள பொலிஸ் பயிற்சிக் கல்லூரியில் மேற்கொள்ளப்பட்ட தாக்குதல் அதனை தேவையற்றதாக்கியிருக்கிறது.
தலிபான் இயக்கத்தைச் சேர்ந்த 142 பேர் களின் பெயர்கள் ஐ.நா.வின் தீவிரவாதிகள் பட்டியலில் உள்ளன. இந்நிலையில், தலிபான் இயக்கத் தலைவர் முல்லா முகமது ஓமருடன் சமரச பேச்சுவார்த்தை நடத்த ஆப்கானிஸ்தான் ஜனாதிபதி ஹமீட் கார்சாய் தீர்மானித்திருக்கிறார்.
இந்த நிலையில் பாகிஸ்தானின் லாகூர் நகருக்கருகில் அமைந்துள்ள பொலிஸ் பயிற்சி நிலையம் மீது மார்ச் 30ஆம் திகதி மேற்கொள்ளப்பட்ட தாக்குதலில் 22 பேர் பலியானதுடன், 90  பேர் வரை காயமடைந்தனர்.
பயிற்சிக்கல்லூரியினுள் பொலிஸாரின் சீருடையில் நுழைந்த ஆயுததாரிகள் கண்மூடித்தனமான முறையில் துப்பாக்கிப் பிரயோகங்களையும் கைக்குண்டு வீச்சுகளையும் மேற்கொண்டுள்ளனர். சுமார் 14 பேர் இத் தாக்குதலில்ஈடுபட்டிருக்கலாமென கருதப்படுகிறது.
மனாவன் பொலிஸ் பயிற்சி கல்லூரி என அழைக்கப்படும் இப் பயிற்சி நிலையம் நகரின் எல்லைப்பகுதிக்கு வெளிப்புறத்தில் இந்திய எல்லைப்பகுதிக்கான வீதியில் உள்ளது.
பொலிஸுக்கு புதிதாக சேர்த்துக் கொள்ளப்பட்ட 850 பயிற்சியாளர்கள் இந்த நிலையத்தில் சம்பவம் நடைபெற்ற நேரத்தில் இருந்துள்ளனர். காலையில் தமது வழமையான பயிற்சிகளை மேற்கொண்டிருந்த போது ஆயுததாரிகள் நிலைய த்தின் நான்கு பக்கங்களிலிருந்தும் தாக்குதல்களை ஆரம்பித்துள்ளனர்.
8 மணிநேரம் வரை தொடர்ந்த இந்தத் தாக்குதல் பின்னர் விசேட துருப்புக்கள் வர வழைக்கப்பட்டு தாக்குதலின் நிலைமை கட்டுப்பாட்டுக்குள் கொண்டு வரப்பட்டுள்ளது. தொலைக்காட்சி செய்திகள் பயிற்சி நிலையத்தினுள் பல அதிகாரிகள் நினைவிழந்து வீழ்ந்து கிடப்பதை ஒளிபரப்பின.
எத்தனை தாக்குதலாளிகள் வந்தார்கள் என்பதோ எத்தனை பேர் பலியானார்கள் என்பதோ அல்லது எத்தனை பேர் அருகிலுள்ள கட்டிடங்களில் மறைந்திருக்கிறார்கள் என்பதோ இதுவரை எமக்குத் தெரியாது. நாம் தொடர்ந்து போராடிக்கொண்டிருக்கிறோமென சம்பவ இடத்திலிருந்த அதிகாரியொருவர் சண்டை நடைபெறும் போது அறிவித்தல் கொடுத்திருக்கிறார்.
இலங்கை கிரிக்கட் அணி வீரர்கள் மீது தாக்குதல் நடத்தப்பட்டு ஒரு மாதம் கூட ஆகாத நிலையில் அதே விதமான பாணியில் மற்றொரு தாக்குதலும் நடத்தப்பட்டுள்ளது. பாகிஸ்தானில் குழப்பத்தை ஏற்படுத்தியிருக்கிறது.
இந்தியாவின் மும்பையில் நடத்தப்பட்ட தாக்குதல் பாணியில் நடத்தப்பட்ட தாக்குதலை தலிபான்கள் தாமே மேற்கொண்டதாக அறிவித்திருக்கின்றனர்.
இத்தாக்குதலைத் தமது குழுவினரே மேற்கொண்டதாக பாகிஸ்தானிலுள்ள தலிபான்களின் தலைவர் பைதுல்லாஹ் மசூத் சர்வதேச ஊடகங்களுக்கு தொலைபேசி மூலம் தெரிவித்திருக்கிறார். ஆப்கானிலுள்ள அமெரிக்கப் படையினரால் தொடர்ச்சியாக மேற்கொள்ளப்படும் ஏவுகணைத் தாக்குதல்களுக்கு பழிவாங்கும் முகமாகவே இத் தாக்குதலை நடத்தப்பட்டதாக அவர் தெரிவித்திருக்கிறார்.
அத்துடன் லாகூர் தாக்குதலுக்கு ஒரு வாரத்துக்கு முன்னர் பாதுகாப்புப் படையினரின் வாகனத் தொடரணி மீது மேற்கொள்ளப்பட்ட தற்கொலைக் குண்டுத் தாக்குதல் மற்றும் மார்ச் 21 ஆம்திகதி புலனாய்வு அமைப்பின் அலுவலகங்கள் மீது நடத்தப்பட்ட தாக்குதல் ஆகியவையும் தமது அமைப்பினராலேயே மேற்கொள்ளப்பட்டதாக அவர் தெரிவித்திருக்கிறார்.
அமெரிக்காவுக்கு பாகிஸ்தான் தொடர்ந்து ஆதரவு வழங்கினால் இவ்வாறான தாக்குதல்களும் நீண்டகாலத்திற்கு தொடருமென எச்சரித்துள்ள மசூத் மார்ச் 27 ஆம் திகதி பாகிஸ்தானின் வடமேற்குப் பகுதியிலுள்ள பள்ளிவாசல் மீது மேற்கொள்ளப்பட்ட தாக்குதலுக்கும் தொடர்பில்லை எனத் தெரிவித்துள்ள னர்.
பாகிஸ்தான் உள்துறை அமைச்சர் ரஹ்மான் மாலிக் லாகூர் தாக்குதல் தலிபான்களின் மசூத்துக்கு விசுவாசமான போராளிகளினாலேயே மேற்கொள்ளப்பட்டிருக்கலாமென தெரிவித்திருந்த கருத்துக்கு ஏற்றால்போல் மசூத் தகவல் வெளியிட்டிருக்கிறார். லாகூரில் நடத்தப்பட்ட தாக்குதலின் போது மூன்று ஆயுததாரிகள் கைது செய்யப்பட்டுள்ளனர்.
பயிற்சிக் கல்லூரி மீது தாக்குதல் நடத்தியவர்கள் 15 நாட்களுக்கு முன்பு ஆப்கானிலிருந்து லாகூருக்கு வந்தவரென உள்துறை அமைச்சர் தெரிவித்திருந்தார்.
அல்கொய்தாவுடன் தொடர்பு இல்லாது ஒரு குறிப்பிட்ட தலிபான் போராளிகள் உள்ளதாக ஆப்கானிஸ்தான் அதிபரிடம் தெரிவித்திருக்கின்ற நிலையில் ஏற்பட்டுள்ள பதற்ற நிலைமை சிக்கலை ஏற்படுத்தியிருக்கிறது.
பாகிஸ்தானிலுள்ள தலிபான்களுக்கும் ஆப்கானிலுள்ள தலிபான்களுக்கும் தொடர்பு இருப்பதுடன் இரு நாட்டு எல்லைகளினூடாக பரஸ்பரம் போராளிகளை பரிமாறப்படுகின்றனர்.
எது எப்படியிருந்தாலும் பாகிஸ்தானில் பயங்கரவாதிகளுக்கு எதிராக தாக்குதல்களை ஆரம்பிப்பதற்கு முன்னர் அந்நாட்டின் தலைவர்களுடன் ஆலோசனை நடத்தப்படுமென அமெரிக்க ஜனாதிபதி பராக் ஒபாமா அண்மையில் தொலைக்காட்சியொன்றுக்கு வழங்கிய பேட்டியில் தெரிவித்திருக்கிறார்.
கடந்த வாரத்தில் ஆப்கானிஸ்தான் மற்றும் பாகிஸ்தான் மீதான கொள்கையில் பாரிய மாற்றங்களை ஏற்படுத்தியுள்ளதாக அறிவித்திருந்த ஒபாமா, இரு நாடுகளினதும் எல்லைப்பகுதியில் அபாயகரமான சூழ்நிலை உள்ளதாக தெரிவித்திருந்தார்.
தீவிரவாதிகளை தோற்கடிப்பதுடன் பாகிஸ்தானுக்கு உதவுவதுமே தமது தாக்குதல் நோக்கத்துக்குக் காரணம் என அமெரிக்கா தெரிவித்திருக்கின்ற நியையில் பாகிஸ்
தானில் நடத்தப்பட்டு வரும் தாக்குதல்கள் தலிபான்களுக்கு இன்னமும் நெருக்குதல்களையே தோற்றுவிக்கும் என்பதில் ஐயமில்லை.
அல் கொய்தாவுக்கெதிரான நடவடிக்கையை பாகிஸ்தானுடன் இணைந்து முன்னெடுக்க வேண்டிய தேவையை உணர்ந்து அதில் உறுதியாக உள்ள அமெரிக்காவின் நடவடிக்கைகளில் மோசமான விளைவுகளைச் சந்திக்க தலிபான்கள் தயாராவதாகவே அண்மைய தாக்குதல்களைக் கொள்ள முடிகிறது.