பேசும் தாரகை

மட்டக்களப்பு ஏறாவூர் புகையிரத நிலையத்தின் முன்னால் பொலிஸ் ஜீப் வண்டியை இலக்கு வைத்து வியாழக்கிழமை இரவு 8.20 மணியளவில் மேற்கொள்ளப்பட்ட சைக்கிள் கிளைமோர்த் தாக்குதலில் 3 பொலிசாரும் 2 பொதுமக்களும் படுகாயமடைந்து மட்டக்களப்பு போதனா வைத்தியசாலையில் அனுமதிக்கப்பட்டுள்ளனர்.

இரவு 8.15 மணியளவில் மட்டக்களப்பிலிருந்து கொழும்புக்குச் செல்லும் ரயில் வண்டியில் ஏறாவூரிலிருந்து பயணிக்கும் பயணிகளை சோதனையிடுவதற்காகச் சென்ற பொலிசாரை இலக்கு வைத்தே இத் தாக்குதல் மேற்கொள்ளப்பட்டுள்ளதாக ஏறாவூர் பொலிசார் தெரிவித்துள்ளனர்.

தினமும் 7 முதல் 8 பொலிசார் இவ்வாறு இரவு சென்று புகையிர நிலையத்தில் பயணிகளைச் சோதனையிடுவது வழக்ககமாகும். இன்றும் இவர்கள் சென்ற வேளை ஏறாவூர் எல்லை வீதி சந்திக்கருகில் நிறுத்தி வைக்கப்பட்ட சைக்கிளில் மறைத்து வைக்கப்பட்டிருந்த குண்டு வெடித்ததில் ஜீப் வண்டி பலத்த சேதத்திற்குள்ளானதுடன் 5 பேர் காயமடைந்துள்ளனர்.

காயமடைந்தவர்கள் ஏறாவூர் மாவட்ட வைத்திசாலையில் அனுமதிக்கபபட்டு அவசர சிகிச்சைகள் நிமித்தம் மட்டக்களப்பு போதனா வைத்தியசாலைக்கு அனுப்பி வைக்கப்பட்டுள்ளனர்.

இதன் பின்னர் மட்டக்களப்பிலிருந்து புறப்பட்ட ரயில் சிறிது நேரம் நிறுத்தி வைக்கப்பட்டு பின்னர் பயணத்திற்கு அனுமதிக்கப்பட்டது.

தாக்குதலைத் தொடர்ந்து இப்பிரதேசத்தில் சோதனை நடவடிக்கைகயில் பொலிசாரும் விசேட அதிரடிப்படையினரும் ஈடுபட்டனர்.

அரச நியமனம் வழங்கக்கோரி மட்டக்களப்பு கல்வி அலுவலகத்திற்கு முன்பாக சுழற்சி முறையிலான உண்ணாவிரதப் போராட்டத்தில் ஈடுபட்டுவந்த வேலையற்ற பட்டதாரிகள் தமது போராட்டத்தினை கிழக்கு மாகாண முதலமைச்சரின் உறுதிமொழியை அடுத்து கைவிட்டுள்ளனர்.

கடந்த செவ்வாய்க்கிழமை காலை உண்ணாவிரதப் போராட்டத்தினை வேலையற்ற பட்டதாரிகள் ஆரம்பித்திருந்தனர். கிழக்கு மாகாண முதலமைச்சர் சி. சந்திரகாந்தன் அன்றிரவு 11 மணியளவில் நேரடியாகச் சென்று வழங்கிய உறுதிமொழியினையடுத்தே வேலையற்ற பட்டதாரிகள் உண்ணாவிரதப் போராட்டத்தினை கைவிட்டுள்ளனர்.

வேலையற்ற அனைத்து பட்டதாரிகளுக்கும் நியமனம் வழங்கப்படவேண்டும் என்னும் கோரிக்கையினைத் தாம் ஜனாதிபதியிடம் நேரடியாகச் சென்று பேசி இவ்விடயத்தில் நல்ல தீர்வினைப் பெற்றுத் தருவதாக முதலமைச்சர் போராட்டத்தில் ஈடுபட்டவர்களிடம் கொடுத்த வாக்குறுதியில் நம்பிக்கை வைத்தே செவ்வாய்க்கிழமை இரவு 11 மணியுடன் இந்த உண்ணாவிரதப் போராட்டம் கைவிடப்பட்டுள்ளது.

இதேவேளை பட்டதாரி ஆசிரியர்கள் நியமனத்தில் இருந்த இழுபறி நிலைக்கும் முடிவு காணப்படவுள்ளது. நேர்முகப் பரீட்சையின் ஊடாக ஆசிரியர் நியமனம் பெறத் தகுதி பெற்ற அனைவருக்கும் வேலைவாய்ப்பு வழங்க முடியாத நிலைக்கு முற்றுப்புள்ளி வைக்கப்படவுள்ளதாக கிழக்கு மாகாண சபை வட்டாரங்கள் தெரிவித்தன.

களுதாவளையில் அரசுப் படையினரால் இரு அப்பாவி குடும்பஸ்தர்கள் படுகொலை செய்யப்பட்ட தன் மூலம் அங்கு படையினரின் கொடூரச் செயல்கள் தொடர்வது நிரூபிக்கப்பட்டுள்ளதாக தமிழ் தேசிய கூட்டமைப்பின் பாராளுமன்ற உறுப்பினர் த.கனகசபை கண்டனம் தெரிவித்துள்ளார்.

இது தொடர்பாக கூட்டமைப்பு பாராளுமன்ற உறுப்பினர் த.கனகசபை எம்.பி. விடுத்துள்ள அறிக்கையில் மேலும் தெரிவிக்கப்பட்டுள்ளதாவது:

களுதாவளையில் ஞாயிற்றுக்கிழமை அரச படையினரால் எந்தவொரு சம்பவத்திலும் ஈடுபடாத இரண்டு அப்பாவி பொது மக்கள் கொல்லப்பட்டும் இருபது பேருக்கு மேற்பட்டோர் காயமுற்றும் வைத்தியசாலையில் அனுமதிக்கப்பட்டும் நூற்றுக்கும் மேற்பட்டோர் தாக்கப்பட்டுமுள்ளனர்.

நூற்றுக்கும் மேற்பட்டோர் களுவாஞ்சிக்குடி பொலிஸ் நிலையத்திற்கு அழைத்து செல்லப்பட்டு எனது தலையீட்டினால் விடுவிக்கப்பட்டனர்.

அத்துடன் தாக்குதல் இடம்பெற்ற இடத்திற்கு அருகிலுள்ள வீடுகளுக்குள் புகுந்த படையினர் வீட்டிலுள்ள பொருட்களையும் சேதமாக்கியுள்ளனர்.

படையினரின் இத்தகைய அத்துமீறிய செயற்பாட்டை வன்மையாக கண்டிப்பதுடன் பாதிக்கப்பட்டவர்களுக்கு எனது கவலையையும் தெரிவிக்கின்றேன்.

படையினரின் இவ்வாறான செயலினால் அப்பகுதி மக்கள் பெரும் பதற்றமும் பீதியுமடைந்துள்ளனர். இத்தாக்குதல் சம்பவம் தொடர்பாக ஜனாதிபதி மஹிந்த ராஜபக்ஷவின் கவனத்திற்கு கொண்டு வந்துள்ளேன்.

இச்சம்பவம் தொடர்பாக நீதியான விசாரணை நடத்தப்பட்டு குற்றவாளிகள் மீது சட்ட நடவடிக்கை எடுக்க வேண்டும். அத்துடன் இவ்வாறான நடவடிக்கைகள் எதிர்காலத்தில் மேற்கொள்ளப்படுவதை நிறுத்த வேண்டும்.

கொல்லப்பட்டவர்களின் குடும்பத்தினருக்கும் காயமடைந்த மற்றும் வீடுகள், பொருட்கள் சேதமாக்கப்பட்டமைக்கும் உரிய நடவடிக்கை எடுக்க வேண்டுமென அகதிகள் மற்றும் புனரமைப்பு அமைச்சரின் செயலாளர் மற்றும் அரச அதிபரிடம் கேட்டுள்ளேன்.

எனவே, கிராம அதிகாரிகள் மூலம் பிரதேச செயலாளரிடம் விண்ணப்பிக்குமாறு அனைவரையும் கேட்டுக் கொள்கிறேன் எனத் தெரிவிக்கப்பட்டுள்ளது.

இலங்கைக்கான சுவிற்சர்லாந்து நாட்டுத் தூதுவர் திருமதி ரூத் பிலின்ட் புதன்கிழமை காலை மட்டக்களப்பு மாவட்டத்திற்கு விஜயம் செய்தார்.

மட்டக்களப்பு மாநகர மேயர் திருமதி சிவகீதா பிரபாகரனைச் சந்தித்து மாநகர சபை மண்டபத்தில் கலந்துரையாடினார். அமெரிக்க இலங்கை மிசனுக்கு விஜயம் செய்த சுவிஸ் தூதுவர், அமெரிக்க மிசன் தலைவர் கலாநிதி எஸ்.ஜெயநேசனுடன் பேச்சு நடத்தினார்.

சமாதானக் குழுத் தலைவர் அருட் தந்தை மில்லர், சர்வதேச செஞ்சிலுவைச் சங்க வதிவிடப் பிரதிநிதி உட்பட சர்வமத அமைப்புக்களின் பிரதிநிதிகளையும் அவர் சந்தித்துப் பேசினார்.

இவரது சந்திப்புக்களின் போது தற்போதைய சமாதான நடவடிக்கைகள், சுனாமி மற்றும் யுத்தத்தினால் ஏற்பட்ட பாதிப்புக்கள், மீள் குடியேற்றம் உட்பட பல விடயங்கள் தொடர்பாக ஆராயப்பட்டுள்ளது.

இவரது வருகைக்குச் சில தினங்களுக்கு முன்னர் சமாதான செயலகப்பணிப்பாளர் மட்டக்களப்புக்கு விஜயம் செய்து மட்டக்களப்பு மாவட்ட அரசாங்க அதிபர் உள்ளிட்ட அதிகாரிகளைச் சந்தித்து உரையாடியிருந்தார்..